Монголын Засгийн газрын төлөөлөгчид Дорнын эдийн засгийн чуулганы үеэр Оросын албаныхан болон “Роснефть”, “Газпром нефть”, “Оросын төмөр зам” компанийн төлөөлөлтэй уулзав. Аж үйлдвэр, эрдэс баялгийн яам есдүгээр сараас бензиний нийлүүлэлтийг нэмэгдүүлж, аравдугаар сараас өвлийн дизель түлшийг тогтвортой өгөх үйл ажиллагааны тохиролцоонд хүрснийг мэдээллээ.
Тавдугаар сараас тасалдсан онгоцны түлшний нийлүүлэлтийг есдүгээр сард сэргээхээр болсон бөгөөд гуравдагч улсын захиалгыг Владивосток, Транссибирийн төмөр зам, Наушкигаар дамжуулах боломжийг хэлэлцжээ. Богино хугацааны эдгээр арга хэмжээнээс гадна эх үүсвэрээ төрөлжүүлэх, нөөц ба агуулахыг нэмэх, хил логистикийн найдвартай байдлыг сайжруулах шаардлага хэвээр байна.