Багахангай–Хөшигийн хөндий–Эмээлтийн төмөр замыг есдүгээр сард нээхээр төлөвлөжээ

Засгийн газар 214.9 км урт Багахангай–Хөшигийн хөндий–Эмээлт чиглэлийн төмөр замын төслийг эрчимжүүлж, салбар хоорондын уялдаа болон нэгдсэн удирдлагыг сайжруулах үүрэг өглөө. Есдүгээр сард ашиглалтад оруулах зорилтын хүрээнд зурвас газрын чөлөөлөлт, барилга байгууламж нүүлгэх, цахилгааны шугам, дэд станцыг хамгаалах буюу шилжүүлэх ажлыг түргэтгэнэ.

Төмөр зам Багахангай өртөөнөөс салж, Төв аймгийн Хөшигийн хөндий, Алтанбулаг сумаар дамжин Эмээлт өртөөнд холбогдоно. 87.8 км эхний хэсгийн гүүр, ус өнгөрүүлэх хоолойн ажил дууссан бөгөөд дээд бүтцийн угсралт 86.6 хувьтай. Хоёрдугаар хэсгийн газар шорооны ажил 48.2 хувьтай үргэлжилж байна.