Монголбанк бодлогын хүүг 12.5 хувь болгож нэмэгдүүлэв

Монголбанкны Мөнгөний бодлогын хорооны ээлжит бус хурлаар бодлогын хүүг 0.5 нэгж хувиар нэмэгдүүлж 12.5 хувь, арилжааны банкуудын заавал байлгах нөөцийн хувь хэмжээг 14.5 хувь болголоо.

Төв банк энэхүү шийдвэрийг инфляцын хүлээлтийг тогтворжуулах, шатахуун болон хүнсний үнийн өсөлт эдийн засгийн бусад хэсэгт дамжих эрсдэлийг хязгаарлах зорилготой гэж тайлбарлав. Долдугаар сарын жилийн инфляц улсын хэмжээнд 13 хувь байсан. Улирлын мах, хүнсний ногооны нийлүүлэлт хүнсний үнийг сааруулж болох ч эрчим хүчний үнэ суурь инфляцад эрсдэл хэвээр байна. Нүүрс, зэсийн экспортын орлого нэмэгдсэнээр гадаад тэнцэлд дэмжлэг үзүүлж, валютын нөөц 7.9 тэрбум ам.долларт хүрчээ.